تبلیغات
وبگاه اختصاصی شیروان و چرداول - شارستانی شیروان و چه‌رداول
وبگاه اختصاصی شیروان و چرداول
معرفی شهرستان شیروان چرداول
با نام و یاد خدای بزرگ، وبگاه شهرستان شیروان چرداول را راه اندازی می كنیم. قصد داریم در این وبگاه به معرفی هر چه بیشتر جاذبه ها و نقاط دیدنی شهرستان بپردازیم. برای این هدف به كمك و یاری شما دوستان نیاز داریم. امیدواریم كه بتوانیم قدم مثبتی در این زمینه با كمك شما عزیزان برداریم. دوستانی كه مایل به تبادل لینك با ما هستند، لطفاً ما را با نام " جاذبه های دیدنی شیروان چرداول " و با آدرس اینترنتی " www.Shirvaan.mihanblog.com " لینك كنند و ما را مطلع نمایند تا ما نیز آنها را پس از بررسی سریعاً لینك كنیم.

منتظر مطالب و عكسهای شما دوستان هستیم تا با نام خودتان در وبلاگ قرار داده شود. عكسها و مطالبتان را به ایمیل با نشانی زیر بفرستید و برای سرعت بیشتر برای رسیدگی به ایمیل شما، در قسمت نظرات وبلاگ یادآور شوید كه ایمیل فرستاده اید shirvaan2010@gmail.com

 

شارستانی شیروان و چه‌رداول

پارێزگای ئیلام به‌ هۆی ئه‌وه‌ی که‌ ڕشته‌کێوی زاگڕۆسی پێدا تێده‌په‌ڕێ، هه‌موو جوانی و دڵڕفێنییه‌کانی ئه‌و ڕشته‌کێوه‌شی له‌خۆگرتووه‌ و هه‌ر به‌م پێیه‌ش وه‌ک بووکی زاگڕۆس ناوی ده‌برێ و ده‌کرێ له‌م پارێزگایه‌دا شارستانی کۆنی شیروان و چه‌رداول وه‌ک بووکی هه‌موو جوانی و دڵگیرییه‌کانی سروشت له‌م پارێزگایه‌دا ناو ببه‌ین که‌ به‌رزایی و کێوگه‌لی مه‌زن، ده‌ر و دۆڵی به‌رین، داوێن و نساری سه‌رسه‌وز و چیای سه‌رکێشی داپۆشراو به‌ لێڕه‌واری جۆراوجۆر، رووباری خوڕێن که‌ سه‌رچاوه‌که‌ی له‌ دڵی کێوه‌کانه‌وه‌ هه‌ڵده‌قوڵێ و زۆر قه‌ڵا و یادگار و ئاسه‌واری مێژوویی‌ که‌ باس له‌ رابردوو و مێژووی ده‌سه‌ڵاتداره‌تی میرانی کورد و ده‌سه‌ڵاتدارانی ناوچه‌که‌ ده‌که‌ن، له‌خۆده‌گرێ. هه‌مووی ئه‌مانه‌، نه‌رمونیانی و دڵخۆشی و جوانییه‌کی بێوێنه‌‌ به‌تایبه‌ت له‌ وه‌رزی به‌هار به‌ سروشتی ناوچه‌که‌ ده‌به‌خشن که‌ ئه‌مانه‌ش گیرایی و دڵڕفێنی بۆ موسافیران و میوانان به‌ دیاری دێنن که‌ له‌ که‌متر شوێنێک وێنه‌ی ده‌بینرێ.

شارستانی شیروان و چه‌رداول له‌ باکووری خۆرهه‌ڵاتی پارێزگای ئیلام دا هه‌ڵکه‌وتووه‌. ناوه‌ندی ئه‌و شارستانه‌ شاری سه‌رابله‌یه‌ که‌ ده‌که‌وێته‌ ته‌نیشت رووباری سه‌رابله‌. بوونی ئاسه‌واری مێژوویی به‌جێماو له‌ سه‌رده‌می ساسانییه‌کان، بۆته‌ هۆی ئه‌وه‌یکه‌ ئه‌م شارستانه‌ گرینگی مێژوویی تایبه‌تی هه‌بێ و وه‌ک یه‌کێک له‌ کۆنترین ناوچه‌کانی ئیلام بژمێردرێ. ئه‌م شارستانه‌ له‌ چوار به‌خشی شیروان، چه‌رداول، ئاسماناوا و هه‌لیلان پێکهاتووه‌.

شیروان یه‌کێک له‌ به‌خشه‌کانی شارستانی شیروان و چه‌رداوله‌. له‌ کتێب و به‌ڵگه‌ مێژووییه‌کاندا، ناوچه‌ی شیروان وه‌ک به‌شێک له‌ شارستانی شیروان و چه‌رداول، مێژوویه‌کی کۆنی هه‌یه‌ و ئه‌م ده‌ڤه‌ره‌ به‌هۆی بوونی شارێکی کۆن تێیدا هه‌ر به‌و ناوه‌ ناوبانگی ده‌رکردووه‌.  ئه‌و ناوچه‌یه‌ که‌ له‌ باکووری خۆرهه‌ڵاتی پارێزگای ئیلام و له‌ 100 کیلۆمیتری شاری ئیلامدا هه‌ڵکه‌وتووه‌،  یه‌کێک له‌ ناوچه‌ پڕپیت و به‌ره‌که‌ته‌کانی پارێزگاکه‌یه‌ و ناوه‌نده‌که‌شی شاری لووماره‌. له‌و هۆکارانه‌ی که‌ یارمه‌تی به‌ پڕباربوونی ئه‌و ناوچه‌یه‌ داوه‌، بوونی رووباری سه‌یمه‌ره‌یه‌ له‌ خۆرهه‌ڵاتی ئه‌و ده‌ڤه‌ره‌ که‌ له‌ ته‌واوی وه‌رزه‌کانی ساڵدا ئاوێکی زۆری پێدا ده‌ڕوا که‌ ده‌کرێ به‌هۆی زیندووکردنه‌وه‌ی سه‌رچاوه‌ ئاوییه‌کان و هه‌روه‌ها سازکردنی به‌نداو له‌ سه‌ر ئه‌م رووباره‌، بکرێته‌ ناوچه‌یه‌کی گرینگی ئابووری و گه‌شتیاری. ئه‌م ناوچه‌یه‌ له‌ وه‌رزی به‌هاردا، ده‌بێته‌ یه‌کێک له‌ جوانترین ناوچه‌کانی پارێزگای ئیلام و هه‌ر له‌م وه‌رزه‌دا زۆر مسافیر و گه‌شتیاری ناخۆجێیی رووده‌که‌نه‌ ئه‌و مه‌ڵبه‌نده‌.

چه‌رداول ناوچه‌یه‌ک له‌ شارستانی شیروان و چه‌رداوله‌. به‌خشی چه‌رداول له‌ داوێنی باشووری رشته‌ کێوه‌کانی زاگرۆس دا هه‌ڵکه‌وتووه‌ و ئاووهه‌وایه‌کی کوێستانی هه‌یه‌. ئه‌م ناوچه‌یه‌ له‌ 2 به‌شی کوێستانی و ده‌شتی تا راده‌یه‌ک ته‌خت پێکهاتووه‌.  به‌شه‌ کوێستانییه‌که‌ی به‌ داری به‌ڕوو، بادام، وه‌ن و گوێنی داپۆشراوه‌. له‌وه‌ڕگه‌کانی به‌خشی چه‌رداول زیاتر که‌وتۆته‌ ناوچه‌ کوێستانییه‌کانی ئه‌و ده‌ڤه‌ره‌و هه‌ر ئه‌مه‌ش بوارێکی باشی بۆ ئاژه‌ڵداری سوننه‌تی خۆش کردووه‌ و هه‌ر به‌م پێیه‌ش شوغڵی سه‌ره‌کیی دانیشتوانی به‌شه‌ کوێستانییه‌که‌ی ئاژه‌ڵداری یان ماڵات راگرتنه‌.

هه‌ڵکه‌وتی جوغڕافیایی

سه‌رابله‌ ناوه‌ندی شارستانی شیروان و چه‌رداول، له‌ نێوان 46 پله‌ و 32 خوله‌ک له‌ باری درێژی جوغرافیاییدا و 33 پله‌ 46 خوله‌ک له‌ باری پانایی جوغڕافیاییدا هه‌ڵکه‌وتووه‌ و 1050 میتر له‌ ئاستی ده‌ریاوه‌ به‌رزه‌. سه‌رابله‌ له‌ 118 کیلۆمیتری باکووری خۆرهه‌ڵاتی ئیلام و له‌ سه‌ر جاده‌ی سه‌ره‌کیی لوومار بۆ گیلانی خۆراوا هه‌ڵکه‌وتووه‌. شارستانی شیروان و چه‌رداول له‌ باکووره‌وه‌ به‌ به‌ پارێزگای کرماشان، له‌ خۆراواوه‌ به‌ ئه‌یوان، له‌ باشووره‌وه‌ به‌ شارستانی ئیلام و له‌ خۆرهه‌ڵاته‌وه‌ به‌ شارستانی کووهده‌شته‌وه‌ لکاوه‌.  ئاووهه‌وای ئه‌و ده‌ڤه‌ره‌ تا راده‌یه‌ک فێنک و شێداره‌ و نێونجی بارینی باران له‌ ساڵدا ده‌گاته‌ 500 میلی میتر. گرینگترین رووباری ئه‌و شارستانه‌، رووباری سه‌یمه‌ره‌یه‌ و رووباره‌کانی تری ئه‌و هه‌رێمه‌ بریتین له‌: رووباری چه‌رداول، رووباری شیروان، رووباری هه‌لیلان و رووباری زه‌نگوان.

پێشینه‌ی مێژوویی

ئه‌م شارستانه‌ له‌ ناوه‌نده‌ مێژووییه‌کانی پارێزگای ئیلامه‌ که‌ پێشینه‌ی مێژووه‌که‌ی ده‌گه‌ڕێته‌وه‌ بۆ سه‌رده‌می ساسانییه‌کان. پاشماوه‌ی ئاسه‌واری مێژوویی و که‌ونارای وه‌ک شاری سه‌راب که‌لان، قه‌ڵای مێژوویی و ئاته‌شگه‌ی سام، بوونی نزیکه‌ی 160 ته‌پۆڵکه‌ و ئاسه‌واری شارستانه‌تیی که‌ونارا له‌ به‌خشی هه‌لیلان و زۆر ئاسه‌وار و شوێنی دیکه‌ پیشانده‌ری ئه‌و پێشینه‌ مێژووییه‌یه‌. له‌ شیروانی کۆن که‌ شارێک له‌ باکووری رووباری سه‌یمه‌ره‌وه‌ بووه‌، شوێنه‌واری وێرانه‌گه‌لێکی زۆر به‌جێماوه‌ که‌ له‌ پاشماوه‌ی گه‌چ و به‌ردینه‌کان دا، ئاسه‌واری سه‌رده‌می ساسانییه‌کانیس به‌رچاو ده‌که‌وێ.

هه‌رچۆنێک بێ، شیروان و چه‌رداول له‌ ساڵی 1360ی هه‌تاوی له‌ شارستانی ئیلام جیابۆوه‌ و له‌ دابه‌شکاری وڵاتدا تا پێش ئه‌و رێکه‌وته‌ وه‌ک یه‌کێک له‌ به‌خشه‌کانی ئه‌و شارستانه‌ ده‌ژمێردرا. پێش ئه‌وه‌ی که‌ سه‌رابله‌ ببێته‌ ناوه‌ندی ئه‌و شارستانه‌، ئاوایی "شواو" گرینگی زیاتری هه‌بوو. خه‌ڵکی  لادێکان زۆربه‌ی حه‌شیمه‌تی شاری سه‌رابله‌ پێک دێنن.

حه‌شیمه‌ت

به‌پێی سه‌رژمێری ناوه‌ندی ئاماری ئێران، حه‌شیمه‌تی شارستانی شیروان و چه‌رداول له‌ ساڵی 1385دا 73973 که‌س بووه‌ که‌ له‌ ساڵی 1389دا گه‌یشتۆته‌ نزیکه‌ی 100 هه‌زار که‌س. ئه‌م حه‌شیمه‌ته‌ روو له‌ په‌ره‌سه‌ندن و لاوه‌ پێویستی به‌ زۆر ئیمکاناتی ئه‌مڕۆیی و سه‌رده‌میانه‌ هه‌یه‌ تا بتوانێ نیازه‌ رووحی و ده‌روونییه‌کانی خۆی دابین بکا که‌ به‌ داخه‌وه‌ له‌مباره‌وه‌ ئه‌م شارستانه‌ش وه‌ک زۆربه‌ی ناوچه‌کانی دیکه‌ی کوردستان زۆر بێبه‌شه. خه‌ڵکی ئه‌م شارستانه‌ زیاتر به‌ زاراوه‌ی فه‌یلی یان کوردی ئیلامی قسه‌ ده‌که‌ن. ‌

 

سه‌نعه‌ت و کانزاکان

سه‌نعه‌ته‌ ده‌ستییه‌کان، گرینگترین سه‌نعه‌تی ئه‌م ناوچه‌یه‌ پێک دێنن. قاڵی و قاڵیچه‌ و فه‌ڕش له‌و سه‌نعه‌ته‌ ده‌ستییانه‌ی شارستانی شیروان و چه‌رداوله‌ ‌ که‌ بۆ ده‌ره‌وه‌ و ناوه‌وه‌ی ئه‌و ده‌ڤه‌ره‌ به‌ڕێ ده‌کرێ.

کشتووکاڵ و ئاژه‌ڵداری

کشتووکاڵ و ئاژه‌ڵداری له‌و ناوچه‌یه‌دا زۆر به‌ڕمێنه‌. وه‌رزێری و باغداری له‌ گرینگترین شوغڵه‌کانی خه‌ڵکی ئه‌و شارستانه‌یه‌ و ئاوی زه‌وییه‌ به‌راوه‌کانیش له‌ رووباره‌کانه‌وه‌ دابین ده‌بێ. کاری وه‌رزێری زیاتر به‌ شێوه‌ی دێمییه‌ و به‌رهه‌مه‌ کشتوکاڵییه‌کانی ئه‌و مه‌ڵبه‌نده‌ بریتین له‌: گه‌نم، جۆ، برنج، خه‌یار، هه‌نار، قه‌یسی، سێو، هه‌ڵووچه‌ و زۆر به‌رهه‌می دیکه‌. هه‌روه‌ها ئاژه‌ڵداری و به‌خێوکردنی په‌له‌وه‌ریش له‌و ناوچه‌یه‌دا زۆر باوه‌، به‌جۆرێک که‌ به‌رهه‌می کشتوکاڵی، ئاژه‌ڵ و به‌روبوومی مه‌ڕ و ماڵات و په‌له‌وه‌ر سه‌ره‌کیترین هه‌نارده‌ی ئه‌و قه‌ڵه‌مڕه‌وه‌ پێک دێنن.

خه‌یاری چه‌ند ناوچه‌ له‌ ئیلام زۆر به‌ڕمێن و مه‌ڕغووبه‌، یه‌کیان له‌ ده‌ڤه‌ری ده‌ڕه‌شار و له‌ په‌راوێزی رووباری سه‌یمه‌ره‌یه‌ و یه‌کێکیش له‌ ناوچه‌ی "ئه‌ره‌وێ روودبار" سه‌ر به‌ شیروانه‌، خه‌یاری چه‌می شیر و ئه‌ره‌وێ روودبار به‌راده‌یه‌ک جوان و به‌ڕمێنه‌ که‌ له‌ ده‌ره‌وه‌ی پارێزگای ئیلامیش کڕیاری هه‌یه‌ و به‌ کوردییه‌که‌ی ناکه‌وێته‌ ئه‌رز. ئه‌گه‌ر که‌سانێک بتوانن کارگه‌ی به‌رهه‌مهێنانی خه‌یار شوور له‌و ناوچه‌یه‌ دابنێن، له‌ دوو لاوه‌ به‌ که‌ڵکه‌؛ له‌ لایه‌ک هه‌م که‌سانێکی زۆرتر به‌ کاره‌وه‌ خه‌ریک ده‌بن و له‌ لایه‌کیش  قازانج یان زێده‌باییه‌کی زیاتر به‌ خه‌ڵکی ره‌سه‌نی ئه‌و ناوچه‌یه‌ ده‌گا.

یه‌کێکیتر له‌ به‌رهه‌مه‌ باشه‌کانی ئه‌و ده‌ڤه‌ره‌، هه‌ناری خۆشڕه‌نگ و به‌تامه‌. هه‌نارێک که‌ مزری و ئاودارییه‌‌که‌ی وێردی سه‌ر زاری خه‌ڵکی ناوچه‌که‌  و ته‌واوی ئه‌و که‌سانه‌یه‌ که‌ تامی ئه‌و میوه‌ خۆشڕه‌نگ و به‌ چێژه‌یان کردووه‌. هه‌نار گرینگترین به‌رهه‌می باخییه‌ که‌ له‌ گه‌ڵ بارودۆخی سروشتی "ئه‌ره‌وێ روودبار" و ناوچه‌کانی ده‌ورووبه‌ری سازگاره‌. هه‌ناری ئه‌و ده‌ڤه‌ره‌ هێنده‌ خۆش و به‌تامه‌ که‌ بۆ دوورترین شاره‌کانی ئێران به‌ڕێ ده‌کرێ و خوازیاری زۆری هه‌یه. باخه‌ هه‌ناره‌کانی ئه‌و مه‌ڵبه‌نده‌، بیانوویه‌کی باشن بۆ ئه‌و که‌سانه‌ی که‌ تامه‌زرۆی ئه‌و میوه‌ مزر و به‌چێژه‌ن و ده‌توانن به‌ بیانووی کڕینی هه‌نار بۆ ئه‌و ناوچه‌یه‌ سه‌فه‌ر بکه‌ن و چه‌ند رۆژێک له‌ ژیانیان به‌ خۆشی و شادی له‌و به‌شه‌ له‌ نیشتمانی کوردان تێپه‌ڕ بکه‌ن.

شوێنه‌ دییه‌نی و مێژووییه‌کان

ئه‌م شارستانه‌ش شوێنی دییه‌نی و ئاسه‌واری مێژوویی سه‌رنجڕاکێش و گرینگی تێدایه‌، که‌ هه‌وڵ ده‌ده‌یه‌ن ژماره‌یه‌کیان به‌ ئێوه بینه‌رانی خۆشه‌ویست‌ بناسێنین:

ئاسه‌واری شاری "سه‌راب که‌لان"ی شیروان به‌ نێوی ماسبه‌زان یان سیروان که‌ هی سه‌رده‌می ساسانییه‌کانه‌ و له‌ ئاوایی سه‌راب که‌لان هه‌ڵکه‌وتووه‌. له‌ کتێبی "ایران زمین" و له‌ قه‌ولی "ژاک دێمورگان"، گه‌شتیار و بیرمه‌ندی فه‌رانسه‌یی سه‌ده‌ی نۆزده‌دا هاتووه‌ که‌: هۆکاری بنیاتنانی شاری شیروان بوونی کانیاوێک بووه‌ به‌ ناوی "سه‌راب که‌لان" که‌ هه‌ر له‌و شوێنه‌ هه‌ڵقوڵاوه‌ و پێشینه‌که‌ی ده‌گه‌ڕێته‌وه‌ بۆ سه‌رده‌می ساسانییه‌کان. دێمۆرگان له‌و بڕوایه‌ دایه‌ که‌ شاری شیروان له‌ سه‌رده‌می ئه‌شکانیان و ته‌نانه‌ت پێش له‌ عیلامییه‌کانیش بووه‌ و وێده‌چێ له‌ کۆتایی سه‌ده‌ی چواره‌مدا به‌ هۆی بوومه‌له‌رزه‌وه‌ کاول بووبێ. له‌و کتێبه‌دا هه‌روه‌ها له‌ شاری شیروان وه‌ک سیروانیش ناو براوه‌ و بیناکانیشی وه‌ک بیناکانی مووسڵ و تکریت وه‌سف کراوه‌. ئاوایی "‌سه‌راب که‌لان" که‌ له‌ به‌خشی شیروان و نه‌گه‌یشتوو به‌ شاری لوومار هه‌ڵکه‌وتووه‌، تایبه‌تمه‌ندی زۆر ناوازه‌ و ده‌گمه‌نی هه‌یه‌ که‌ به‌ بوونی ئاسه‌واری به‌نرخی مێژوویی، ده‌کرێ به‌ چاککردنه‌وه‌ و ئه‌نجامدانی پرۆژه‌ی تووریستی و ئیمکاناتی پێویست، رۆڵێکی گرینگ له‌ راکێشان و که‌مه‌ندکێش کردنی تووریست و زیندووکردنه‌وه‌ی مێژوو و شارستانه‌تی رابردووی ناوچه‌که‌ و ته‌نانه‌ت پارێزگای ئیلام‌ بگێڕێ، که‌ به‌ داخه‌وه‌ به‌ داگیرکردنی ئاسه‌واری به‌نرخی ئه‌و شوێنه‌ له‌ لایه‌ن خه‌ڵکه‌وه‌و له‌ناوچوون و کاولبوونی زۆرێک له‌ بینا به‌نرخه‌ باستانییه‌کانی که‌ سه‌رده‌مانێک شارێکی گه‌وره‌ بووه‌، ئه‌م شاره‌ باستانییه‌ هه‌روا له‌بیرکراوه‌ و ده‌سه‌ڵاتداران لێی که‌مته‌رخه‌من و به‌ هه‌ق ده‌ستانێکی ده‌روه‌ست و نیشتمان دۆستی ده‌وێ تا قۆڵی لێ هه‌ڵماڵن و ئه‌م شوێنه‌ بگه‌ڕێننه‌وه‌‌ بۆ پێگه‌ی خۆی له‌  سه‌رده‌می به‌نرخی  مێژوویی دا.

ئاسه‌واری قه‌ڵای مێژوویی و ئاته‌شگای سام: ئه‌م ئاسه‌واره‌ ده‌که‌وێته‌ سه‌ر به‌رزاییه‌کانی ئاوایی چه‌م بوور له‌ به‌خشی چه‌رداول. مێژووی سازکردنی قه‌ڵاکه‌ ده‌گه‌ڕێته‌وه‌ بۆ سه‌رده‌می ساسانییه‌کان. مێعماری قه‌ڵاکه‌ لایه‌نی نیزامی و به‌رگری هه‌یه‌ و له‌ هه‌ڵه‌مووت ترین به‌رزایی کێوه‌که‌ ساز کراوه‌، ئه‌و که‌ره‌ستانه‌ی له‌ سازکردنی قه‌ڵاکه‌ به‌کار براون بریتین له‌: به‌رد، گه‌چ و سارووج. هۆکاری داڕمانی ئه‌م قه‌ڵایه‌ به‌ دروستی روون نییه‌ و شوێنه‌وارناسان هۆکاری رووخانه‌که‌ی ده‌گه‌ڕێننه‌وه‌ بۆ روودانی بوومه‌له‌رزه‌یه‌کی گه‌وره‌ که‌ له‌ ساڵی 334ی کۆچی مانگیدا له‌و ناوچه‌یه‌‌ رووی داوه‌. له‌ داهاتوودا ده‌کرێ به‌ کێشانی جادده‌یه‌کی لاوه‌کی بۆ ئه‌و قه‌ڵایه‌ و نووژه‌نکردنه‌وه‌ی سه‌رله‌نوێی بکرێته‌ شوێنێکی گرینگی تووریستی له‌و هه‌رێمه‌دا.

ته‌نگه‌ڵانی شمشه؛ ئه‌م ته‌نگه‌یه‌‌ له‌ به‌خشی چه‌رداول که‌ بایه‌خیی مێژوویی هه‌یه هه‌ڵکه‌وتووه‌‌. ئه‌م شوێنه‌ که‌ له‌ خوار ئاوایی "هه‌لسم"ه‌وه‌ هه‌ڵکه‌وتووه‌، به‌ هۆی کارتێکه‌ری ئاو له‌سه‌ر به‌رده‌ قسڵییه‌کان و داتاشران و داخورانی ئه‌و به‌ردانه‌ و هه‌روه‌ها په‌نگ خواردنه‌وه‌ی ئاو تێیان دا و په‌یکه‌ر و قه‌ڵافه‌تی تاشه‌به‌رده‌ زه‌به‌ڵاحه‌کان، دیمه‌نێکی جوان و سه‌رنجڕاکێشی به‌و ته‌نگه‌ڵانه‌ به‌خشیوه‌ که‌ ده‌کرێ به‌ ئاسانکاری له‌ ده‌ست پێڕاگه‌یشتن و گه‌یشتن به‌و شوێنه‌، خوازیاران و موسافیرانی ده‌ڤه‌ره‌ ده‌ست لێنه‌دراو و سروشتییه‌کان بۆ ئه‌و شوێنه‌ش که‌مه‌ندکێش بکرێ.

ته‌نگه‌ڵانی سازبن: ئه‌م ته‌نگه‌ڵانه‌ شوێنی پێکگه‌یشتنی رووباری چه‌رداول و رووباری گه‌وره‌ی سه‌یمه‌ره‌یه‌. جوانیی سروشتی ئه‌و ته‌نگه‌ڵانه‌ به‌ به‌ره‌که‌تی رووباری خرۆشانی سه‌یمه‌ره‌ و ته‌پۆڵکه‌کانی زاڵ به‌ سه‌ر ئه‌ودا و هه‌روه‌ها بوونی دیوار و قه‌ڵاگه‌لێک له‌ دڵی کێودا که‌ مێژووه‌که‌یان ده‌گه‌ڕێته‌وه‌ بۆ سه‌رده‌می که‌ونارا، دیمه‌نێکی سێحراوی به‌و ته‌نگه‌یه‌ به‌خشیوه‌ و سرنجی هه‌ر بینه‌رێک بۆ لای خۆی راده‌کێشێ. ئه‌م ناوچه‌یه‌ له‌ به‌ر پێک گه‌یشتنی  دوو رووباری چه‌رداول و سه‌یمه‌ره‌ و به‌رزاییه‌کانی ده‌ورووبه‌ری ئه‌و دوو رووباره‌ و هه‌روه‌ها به‌ سازکردنی به‌نداوی سازبن له‌ داهاتوودا، ده‌کرێ بکرێته‌ ناوچه‌یه‌کی گرینگی گه‌شتیاری له‌و هه‌رێمه‌دا.

ته‌نگه‌ڵانی قیر له‌ به‌خشی چه‌رداول و دووره‌دیمه‌نه‌ جوانه‌کانی رووباری سه‌یمه‌ره‌ و

‌ژماره‌یه‌کی زۆر ته‌پۆڵکه‌ و ئاسه‌واری مێژوویی که‌ونارا هه‌ڵکه‌وتوو له‌ به‌خشی هه‌لیلان که‌ 162 دانه‌یان تۆمار کراون و موتاڵایان له‌ سه‌ر کراوه‌ له‌ شوێنه‌ دیه‌نی و مێژووییه‌کانی دیکه‌ی ئه‌و به‌شه‌ له‌ نیشتمانی کوردانه‌.

 

با تشکر فراوان از ارسال کننده این مطلب : هژیر عبدالله پور

 

آرشیو مطالب
صفحات جانبی
پیوند های روزانه
امکانات جانبی
Shirvaan